घाइते गगनको गर्जन : ‘तपाईँहरुले तर्साउन खोज्नुभएको? सक्नुहुन्न’

काठमाडौँ : दिउँसो चुनावी घरदैलोको क्रममा चपलीमा भएको बम आक्रमणमा घाइते भएका काठमाडौं क्षेत्र नम्बर ४ का प्रतिनिधि सभा सदस्य उम्मेदवार कांग्रेस नेता गगन थापाले उपचार गरेलगत्तै राजधानीको सिफलमा आयोजित चुनावी सभामा सम्बोधन गरेका छन्। 

माइकमा गर्जिँदै टाउकोमा ब्यान्डेज बाँधेका थापाले भने, ‘तपाईँहरुले गर्न के खोज्नुभएको? तपाईहरुले तर्साउन खोज्नुभएको? तपाईँले हामीलाई तर्साउन सक्नुहुन्न।’

घाइते थापा महाराजगञ्जस्थित शिक्षण अस्पतालमा उपचारपछि साँझ ६ बजे कार्यक्रमस्थल पुगेका थिए।

जनयुद्धता कार्यक्रममा निस्कदा आमाले सोधेको प्रश्न स्मरण गर्दै उनले भने, ‘सेना र माओवादीबीच भिडन्त हुँदा म सानो झोला बोकेर विभिन्न जिल्ला जान्थेँ। आमाले भन्नुभएको थियो, 'तँलाई केही भए के होला?'

मैले भन्थेँ, 'मलाई केही भयो भने आमा नरुनुहोला। किनकि मेरो शिर कुनै खाली मैदानमा ढल्ने छैन। कुनै न कुनै आमाको शिरमा ढल्छ। जसको नेपालभरि लाखौ आमाहरु छन्, तपाईले हामीलाई तर्साउन सक्नुहुन्न।’

उनले भने, ‘बम पड्काउनेहरु कायर हुन्। चुनाव पद्धतिसँग विमति छ होला। विमिति राख्ने आफ्नो तरिका हुन्छ। माओवादीहरुले पनि बाँच्नुपर्छ भनेर भन्ने हामी हौँ।’

कार्यक्रममा उनले काठमाडौंजस्तो ठाउँमा दिनदहाडै भएको बम आक्रमणको जवाफ सरकारले दिनुपर्ने बताए। थापाले भने, ‘मध्यदिनमा १२ बजे बुढानिलकण्ठजस्तो ठाउँमा नियोजित रुपमा आनन्दले खुल्ला ठाउँबाट रिमोट कन्ट्रोल बम हानेको छ। सुरक्षाको संवेदनशीलताप्रति गम्भीर प्रश्न उठेको छ। सरकारले यसको जवाफ दिनुपर्छ। सरकारले सबै नागरिकप्रति सुरक्षाको आश्वस्त पार्न सक्नुपर्छ।’

उनले हिजो रातिमात्र सेट गरेको कार्यक्रममा नियोजित रुपले विस्फोट गरेको आरोप लगाए।

बम आक्रमणबारे उल्लेख गर्दै उनले भने, ‘कपनमा कार्यक्रम सकेर ११ बजे हामी पुग्यौँ। हामी कपनबाट जान ढिला भयो। हामी ५ मिनेटमा स्पिड स्लो भएको भन्दै बुलेट जस्तो भएर १० कदम अगाडि बढ्दा संयोगवश बाँचे। धेरै साथीहरु घाइते हुनुभयो। दुईजना गम्भीर घाइते हुनुहुन्छ। पशुपतिनाथले हात थाप्नुभयो।’ 

आफ्ना प्रतिद्वन्द्वी डा राजन भट्टराई भेट्न अस्पतालमा भेट्न आएकोमा उनले सम्मान र धन्यवादसमेत व्यक्त गरेको थिए।

अन्तिम चुनावी प्रचारका दिन धेरै कार्यक्रमहरु तय भएपनि आक्रमणमा पर्दा धेरै कार्यक्रम छुटेको थापाले बताए। सिफलको कार्यक्रममा पनि केही साथीहरुले नजान सल्लाह दिएको उल्लेख गर्दै उनले यस्तो अन्तिम कार्यक्रममा आतंकविरुद्ध आवाज उठाउन भएपनि आफू कार्यक्रममा आएको उनले बताए।

शब्द/फोटो स्रोत : पहिलोपोस्ट

लेखक : नेत्र तामाङ

प्रकाशित मिति : १८ मंसिर २०७४