मखमली चोलो चाहिँदैनमा धेरै नाचेकी छु

मिथिला शर्मा, अभिनेत्री

संगीत के हो र?
संगीत यस्तो तरंग हो, यस्तो साउन्ड हो, जसले मानिसलाई मात्र होइन, प्रकृतिलाई पनि प्रभावित गर्न सक्छ । अमूल्य र असीमित शक्ति बोकेको संगीत यति व्यापक छ कि यसलाई शब्दले व्याख्या गर्न सकिँदैन । संगीत व्याख्या गर्नेभन्दा पनि महसुस गर्ने कुरा हो । यो एउटा साधना हो, जसले समस्त सृष्टिलाई लय र तालमा हिँडाउने काम गर्छ ।

तपाईंले पहिलोचोटि सुनेको र मन पराएको गीत कुन हो र?

पहिलोचोटि कुन गीत सुनेँ भन्ने सम्झना छैन । बुझ्ने भएदेखि नै म गीत सुन्न थालिसकेकी थिएँ । सानो छँदा लोकगीत बढी सुन्थेँ । बढ्दै गएपछि आधुनिक गीत पनि सुन्न थालेँ । अहिले सबै खालका गीत सुन्छु ।

कस्ता गीत बढी मन पर्छ र?
कस्तो गीत मन पर्छ भन्ने कुरा कुन मुडमा गीत सुन्दै छु भन्ने कुराले निर्धारण गर्छ । बालगीत र राष्ट्रगीत अलिक बेसी मन पराउँछु । वास्तवमा म सबै खालका गीत मन पराउँछु । किनकि, संगीत नराम्रो हुन्छ भन्ने मलाई लाग्दैन ।

मानिसलाई संगीत किन मन परेको होला र?
संगीतले मानिसको मनोदशा र भावनालाई छुन्छ । संगीत नसुन्ने मानिस रुखो हुन्छ । संगीतमा ठूलो तागत हुने भएकैले मानिस संगीतप्रति यतिबिघ्न आशक्त भएको हो । अरू कुरा छोडिदिऊँ, कुनै नेताले भाषण गर्नुअघि पनि स्टेजमा गीत घन्काउने गरिन्छ । संगीतले मानिसको भावनालाई उद्वेलित गराउने काम मात्र गर्दैन, यसले मानिसलाई कुनै संगठित कर्ममा लाग्न प्रेरित पनि गर्छ । संगीतले जीवनलाई ‘पोजेटिभ’ बनाउनसमेत मद्दत गर्छ ।

संगीतले जीवनलाई पोजेटिभ बनाउँछ भन्नुभयो, तर संगीत सुनेर आत्महत्या गर्ने प्रवृत्ति पनि त छ नि र ?
गीतले मानिसको भावनालाई स्पर्श गर्छ । कुनै गीतले रमाइलो दिलाउँछ, कुनैले रुवाउँछ । संगीतमा विरह रस पनि हुन्छ । यो रसप्रति आशक्त हुनेहरूले यदाकदा आत्महत्या गरेको पनि सुनिन्छ । तर, संगीत सुनेर आत्महत्या गर्नेभन्दा संगीतमा जीवन खोज्नेहरू नै बढी छन् ।

बाल्यकालमा कस्ता गीत मन पर्थे र?
नौ वर्षको भएपछि म रंगमञ्चमा उत्रिएँ । त्यतिवेलादेखि नै संगीतसँगको सम्बन्ध घनिष्ठ बन्यो । सानोमा लोक भाकामा बढी नाच्थेँ । ‘मखमली चोलो चाहिँदैन’ र गोपाल योञ्जनको ‘वनकी चरी’ बोलको गीतमा म धेरै नाचेकी छु । गोपाल दाइको ‘देशले रगत मागे’ गीतमा पनि नाचेकी छु ।

तपाईंलाई अहिलेसम्म सबैभन्दा बढी मन परेको गीत कुन हो र?
गीतलाई रेटिङ गर्न सकिँदैन । मुडअनुसार गीत राम्रो अथवा धेरै राम्रो हुने गर्छ ।

तपाईंको मन पर्ने गायक र गायिका को–को हुन् र?
पुरानामा नारायणगोपाल, अरुणा लामा, तारादेवीहरू । बच्चुकैलाश, प्रकाश श्रेष्ठ, विमला राई, कुन्ती मोक्तानका गीत पनि राम्रा छन् । नयाँ पुस्तामा अञ्जु पन्तको गीत राम्रो लाग्छ ।

विदेशी संगीत कत्तिको सुन्नुहुन्छ र?
संगीत स्वदेशी–विदेशी भन्ने हुँदैन । नेपालीपन, भारतीयपन आदि भने हुन्छ । संगीत विश्वकै सम्पत्ति हो । विभिन्न देशका शास्त्रीय संगीत सुन्न म रुचाउँछु ।

विदेशी गायक–गायिकामा को मन पर्छ र?
एकजनाको मात्र नाम लिनुपर्‍यो भने म भारतकी आशा भोस्लेको नाम लिन्छु । उनको आवाज भर्सटाइल खालको छ । लता मंगेस्कर, उदितनारायण झाका गीत पनि राम्रो लाग्छ ।

नयाँ पुस्ताले गाएका गीत कस्ता लाग्छन् ?
राम्रै छन् । अस्ति गाडीमा आउँदा नयाँ भाइहरूले गएको र्‍याप गीत रेडियोमा बजिरहेको सुने । गीतमा भाइहरूले कलाकारको जीवनशैलीबारे उल्लेख गर्नुभएको थियो । प्रेजेन्टेसन राम्रो थियो ।

तपाईंको मोबाइलमा कति गीत छन् ?
त्यति धेरै छैनन् । त्यस्तै एक–डेढ सयजति होलान् । ज्यादै मन परेका र मैले नृत्य गरिरहने गीत मोबाइलमा सेभ गरेकी छु । ‘अति सुन्दर मानव जीवन यो’ गीत मोबाइलमा छ । संस्कृतका श्लोकहरू छन् । विमला राईका गीत धेरै छन्, किनकि यिनै गीतमा म नृत्य अभ्यास गर्ने गर्छु ।

नृत्य र संगीतको सम्बन्ध कस्तो हुन्छ ?
मुटु र मुटुको धडकनजस्तो । संगीतलाई अझ परिष्कृत गर्ने काम नृत्यले गर्छ ।

कस्तो ठाउँमा गीत गुनगुनाउनुहुन्छ ?
जहाँ पनि गुनगुनाउँछु । थाहै नपाई गुनगुनाइरहेकी हुन्छु ।

संगीतबाट तपाईंलाई अलग गर्दा के फरक पर्छ तपाईंको जीवनमा ?
संगीत र नृत्यबाट आफू अलग भएको म कल्पना पनि गर्न सक्दिनँ ।

तपाईंलाई आफ्नै स्वर कस्तो लाग्छ ?
ठीकै लाग्छ । अरूको लहैलहैमा गाउँदा रमाइलै लाग्छ ।

तपाईंलाई त्यति मन नपरेको, तर असाध्यै हिट भएको कुनै गीत छ ?
मन नपरेको होइन, अचम्मै पर्ने गरी हिट भएको एउटा गीतचाहिँ छ । एकजना भाइले रुँदै गएको ‘नाइँ मलाई त्यही केटी चाहिन्छ’ बोलको गीत यति धेरै हिट भयो कि म छक्क परेँ । धेरै मानिसले ‘यस्तो पनि गीत हुन्छ’ भन्दै बद्ख्याइँ गर्दै गीत सुने । सुन्दा रमाइलो लाग्छ भने ‘छ्या’ किन भन्नु रु

कस्तो वेला गीत सुन्न रुचाउनुहुन्छ ?
जस्तो वेलामा पनि सुन्न मन पराउँछु । भिजुअलभन्दा म संगीतसँग बढी नजिक छु । राति सुत्ने वेलामा रेडियोबाट पुराना गीत दिने गर्छ, सुन्छु । नयाँ जेनेरेसनले पनि पुराना गीतलाई बिर्सिएका छैनन् भन्ने सोच्छु । रमाइलो लाग्छ ।

अनौपचारिक जमघटमा तपाईंलाई गीत गाउने अफर कत्तिको आउँछ ?
त्यति आउँदैन, किनकि म राम्रो गायिका होइन । कसरी नाच्दा ठीक हुन्छ भनेर सोध्नेचाहिँ गर्छन् । ‘हामीसँगै गाउनु न’ भन्ने साथीचाहिँ छन् ।

तपाईंलाई सबैभन्दा मन परेको राष्ट्रिय गीत कुन हो र ?
गोपाल योञ्जनले गाएका राष्ट्रिय गीत सबै मन पर्छ । शिशिर योगीको ‘यो देशमा म यौटा मानिस खोजिरहेछु’ बोलको गीत राष्ट्रिय भावनाले ओतप्रोत भएको छ । यो गीत साह्रै मन पर्छ । नयाँ पत्रिका.कमबाट