गगन थापाको म्याराथन घरदैलो - २०७४

 काठमाडौं : आइतबार बिहान पौने ९ बजे बुढानिलकण्ठको वडा ११ मा गगन थापाले चुनावी घरदैलो सूरु गरे।

 

रुद्राक्षको माला लगाएका थापाले कपनको ह्यन्डबल ग्राउन्डबाटबाट सुरु गरेको घरदैलोको सुरुवाती गतिको नै तीव्र बन्यो। साथमा थिए उक्त क्षेत्रका ख का कांग्रेस उम्मेदवार साधुराम खड्का र कार्यकर्ताको टोली।

'वडाका कुनै घर छुट्नु हुँदैन,' काठमाडौं क्षेत्र नम्बर ४ मा नेपाली कांग्रेसबाट उम्मेदवार रहेका पूर्व मन्त्री एवं कांग्रेस नेता स्थानीयसँग भन्दै थिए। त्यसपछि घरदैलोको गति अझ बढ्यो।

घरदैलोमा युवाहरुमात्र हैन वृद्धवृद्धाको पनि उतिकै सहभागिता थियो।

एकैछिनको दौडधुपमा केही वृद्धवृद्धा धपेडीमा पनि परे। यसमध्ये एक थिइन ६४ वर्षीया मिश्रीमाया श्रेष्ठ।

श्रेष्ठ भन्दैथिइन्, 'दौडधुप त अलि चर्कै छ, कति दौडन सकेका? तैपनि हामी पनि सँगै दौडिरहेकै छौ। केही गाह्रो भइरहेको छ।' 

बुढानिलकण्ठ आउनुअघि उम्मेदवार थापा बिहानै मैजुबहाल पुगेर आएका थिए।

घरदैलोमा मतदान गर्ने तरिका सिकाउन आइपुगेका भोजकुमार दाहालले पनि धपेडी महसुस गरेछन्। ५८ वर्षे दाहाल भन्दैथिए, 'वडै ठूलो छ। यसैले पनि दौडधुप बढेको छ। गगनको दौड एकदम ठिक छ। यो बेलामा हामी पनि दौडनै पर्यो नि।'

विभिन्न जिल्लाका चुनावी आमसभामा पनि सम्बोधन गर्न जानुपरेकाले थापाको घरदैलो बाँकी बसेको रहेछ। थापा दौडधुपमा भन्दैथिए, 'हिजोअस्ति नै यसरी दौडेको भए आजभोलि त आराम गर्न पाउने रहेछ।'

चुनावी प्रचारमा भेटिइन् वडा १० की महालक्ष्मी अधिकारी। ५७ वर्षीया अधिकारी भन्दैथिइन्, 'यसरी दौडन थालेको तीनचार दिन भइसक्यो। अब प्रचार गर्ने दिन पनि त्यति धेरै छैन। यतिको दौडधुपमा त्यति गाह्रो मानेर पनि भएन।'

दस बज्न लाग्दा घाम पनि चर्कदो थियो। गगन थापा आफै असिनपसिन बनेका थिए। त्यसपछि भने उनले ज्याकेट फुकाले। र, घरदैलोको रफ्तार अझै बढाउन थाले। 

एकैछिनपछि एउटा उकालोमा हस्याङफस्याङ गर्दै भेटिइन् किस्ट मेडिकल कलेजकी प्राध्यापक आरती कार्की। उनी भन्दैथिइन्, 'स्वास्थ्य मन्त्री भएपछि स्वास्थ्यमा ख्याल राखेकैले होला। गगनले घरदैलोमा पनि दौडधुप गर्न सकेका छन्। हामीलाई भने अलि गाह्रै भइरहेको छ।'

घरघरमा स्वागत गर्दै चियापानको अफर गर्ने कार्यकर्ता प्रशस्तै भेटिए। उम्मेदवार थापा भने ढिला हुन्छ भन्दै दौडिहाल्थे।

यसरी उनले वडा ११ मा दिउँसो साढे १ बजेसम्म घरदैलो जारी राखे।

स्रोत : पहिलोपोस्ट

लेखक : नेत्र तामाङ

प्रकाशित मिति : १७ मंसिर २०७४