काठमाडौं : बुधबार काठमाडौंबाट विजयी भएका वाम गठबन्धनका उम्मेदवारहरुलाई बधाई तथा शुभकामना दिने कार्यक्रममा एमाले अध्यक्ष केपी ओली र माओवादी केन्द्रका अध्यक्ष पुष्पकमल दाहाल ‘प्रचण्ड’ आउने जानकारी गराइएको थियो।
प्रमुख अतिथि एमाले अध्यक्ष ओली र विशेष अतिथि माओवादी अध्यक्ष प्रचण्ड हुने आयोजकले कार्यक्रम सुरु हुनसाथ जनाएको थियो।
तर, कार्यक्रममा माओवादी अध्यक्ष प्रचण्ड भने आइपुगेनन्। कार्यक्रममा उनको सट्टा नारायणकाजी श्रेष्ठ आइपुगेको घोषणा गरियो।
किन आइपुगेनन् त प्रचण्ड ? कार्यकर्तामाझ खासखुस चल्यो।
‘माओवादीले एक सिट पनि नजितेको ठाउँमा कहाँ आउँछन् प्रचण्ड?, बरु नारायणकाजी पठाएर ठिकै गरेछन्। हारेको ठाउँमा हारेकै नेता,’ एक कार्यकर्ताले त्यति खुसुक्क के भनेका थिए। एकैछिन हाँसो फैलियो।
काठमाडौंका १० क्षेत्रमध्ये एमालेले ६ क्षेत्र र २० प्रदेशमध्ये १६ प्रदेशमा एमालेका उम्मेदवार निर्वाचित भएका छन्। बाँकी सबैमा कांग्रेस उम्मेदवार निर्वाचित भएका छन्। माओवादीले भने कुनै सिट जित्न सकेन।
कार्यक्रममा काठमाडौं महानगरपालिकाका मेयर विद्यासुन्दर शाक्यले स्वागत भनाइ रखेपछि पालो माओवादी नेता श्रेष्ठले नै पाए।
श्रेष्ठले जनमत वाम गठबन्धनकै पक्षमा आएकोले वैदेशिक रोजगारीमा गएका ४० लाख नेपालीलाई नेपाल फर्काउन सकेमात्र वाम गठबन्धनको विजयी सार्थक हुने बताए।
त्यसैगरी उनले तीन विषयमा वाम गठबन्धन चुक्न नहुने र चाँडै एकीकृत कम्युनिस्ट पार्टीको ब्यानरमा कार्यक्रम आयोजना गर्नुपर्ने राय राखे।
भने,‘हामीले तीन कुरामा चुक्नै हुँदैन, राष्ट्रिय स्वाधीनताका विषयमा चुक्न हुदैन। नेपालमा व्याप्त भ्रष्टाचार अन्त्य गर्नुपर्छ। नयाँ नेपाल बनाउन घोषणापत्र अनुसार काम गर्नुपर्छ।’
कार्यक्रमको अन्त्यमा एमाले अध्यक्ष ओलीले प्रचण्ड धुलिखेलमा नगर्इ नहुने भएकाले यस कार्यक्रममा उपस्थित हुन नसकेको जानकारी गराए।
स्रोत : पहिलोपोस्ट
लेखक : नेत्र तामाङ
प्रकाशित मिति :५ पुष २०७४
No comments:
Post a Comment